निजगढ,राष्ट्रिय स्वतन्त्र पार्टीको बारा जिल्ला संगठन निर्माण विशेष समितिले जिल्लाभरका वडा, पालिका तथा निर्वाचन क्षेत्रस्तरीय सबै सांगठनिक गतिविधि अर्को निर्णय नभएसम्म स्थगित गर्ने निर्णय गरेको छ ।समितिकी संयोजक कामिनी चौधरीद्वारा हिजो जारी सूचनाअनुसार सदस्यता वितरण कार्यबाहेक अन्य सबै गतिविधि आजकै मितिदेखि रोकिएको जनाइएको छ । समितिको जेठ १ गते बसेको बैठकले बारा जिल्लामा देखिएका संगठनात्मक समस्या समाधान तथा आवश्यक समन्वयका लागि विस्तारित बैठक आयोजना गर्ने निर्णय पनि गरेको छ ।
बैठकमा संघीय सांसद, केन्द्र, प्रदेश समिति तथा संघठन विभागका पदाधिकारी, विघटित जिल्ला समिति, निर्वाचन क्षेत्र समितिका सभापति, वडा तथा पालिका समितिका पदाधिकारीसहित सम्बन्धित प्रतिनिधिहरू सहभागी हुने जनाइएको छ । उक्त विस्तारित बैठक २०८३ जेठ ९ गते शनिबार बिहान ११ बजे कलैयास्थित करण राज प्यालेसमा बस्ने तय गरिएको छ ।
समितिले विस्तारित बैठक सम्पन्न भई आवश्यक निर्णय नभएसम्म अन्य कुनै पनि सांगठनिक गतिविधि सञ्चालन नगर्न सम्बन्धित सबैलाई आग्रह गरेको छ । पार्टी नीति विपरित कार्य गरेकोभन्दै १ साताअघि रास्वपाको सचिवालय बैठकले बारा जिल्ला सभापति चन्दन स्वर्णकारलाई साधारण सदस्यबाट निलम्बन गरेर जिल्ला समितिसमेत विघठन गरेपछि कामिनी चौधरीको संयोजकत्वमा संगठन निर्माण संयोजन समिति गठन गरेको हो ।
