नरेश गुप्ता
बरियारपुर – जिल्ला प्रहरी कार्यालय बाराको प्रहरी उपरीक्षक कृष्ण पंगेनिले जिल्लाको शान्ति सुरक्षाको ग्यारेन्टी गर्नु पहिलो प्राथमिकता रहेको बताउनु भएको छ । जिल्ला प्रहरी कार्यालय बारामा आयोजित पत्रकार संगको भेटघाट कार्यक्रममा बोल्दै पंगेनिले अपराधिक गतिविधिमा संलग्न जो कोहिलाई पनि कार्वाही गर्ने बताउनु भयो ।
खुला सिमाना भएको कारण तस्करी नियन्त्रण , लागु औंषध , हातहतियार ओसारपसारमा संलग्न अपराधी क्रियाकलाप गर्ने माथी आफ्नो पहिलो निगरानी रहने बताउनु भयो । पत्रकारहरुले राखेको जिज्ञासामा स्वर्गीय पत्रकार बिरेन्द्र शाहको हत्यारा अहिले पनि खुल्याम घुमिरहेको अवस्था रहेको , समाचार लेखेकै कारण पत्रकारहरुको शान्ती सुरक्षाको ग्यारेन्टीको सवालमा प्रहरी उपरीक्षक पंगेनिले दोषीलाई कार्वाही गर्ने प्रतिबद्धता जाहेर गर्नु भएको थियो ।
मुस्कान सहितको प्रहरी सेवालाई जनमुखी बनाउनु पर्ने ओलाउदै जिल्ला प्रहरी कार्यालय भित्र हुने दलाली , पक्षपातले वास्तविक पिडित न्याय नपाउने दोषी चाहिँ छुटने संभावना भएकोले प्रहरीको न्याय सम्पादनमा गम्भीर हुनु पर्ने पत्रकारहरुले ध्यानाकर्षण गराएको थियो ।
जिल्लाको शान्ति सुरक्षामा कुनै कसर बांकी नराखी सामुदायिक प्रहरी सेवा केन्द्रले गर्दै आएको बाल बिवाह , दहेज प्रथा , महिला हिंसाको घटनालाई जनचेतना मार्फत न्यूनीकरण गर्दै परिमार्जन गर्ने एस पि पंगेनिले पत्रकार संगको भेटघाटमा बताउनु भयो । प्रहरी प्रधान कार्यलय नक्साल बाट सरुवा भैइ आएको जिल्ला प्रहरी बाराको प्रहरी प्रमुख कृष्ण पंगेनी तराईको जिल्ला सर्लाही , जनकपुरमा लामो समय सम्म प्रहरी अनुसन्धानमा कार्यरत रहनु भएको थियो ।
