काठमाडौं । निवर्तमान प्रहरी महानिरीक्षक (आईजीपी) दानबहादुर कार्कीले आफूलाई गैरकानुनी रूपमा पदबाट हटाइएको दाबीसहित सर्वोच्च अदालतमा दायर गरेको रिटमा कात्तिक ३० गतेका लागि पेसी तोकिएको छ।
कार्कीले बिहीबार आफ्ना कानुन व्यवसायीमार्फत सर्वोच्च अदालतमा रिट निवेदन दर्ता गराएका थिए। सर्वोच्च अदालत प्रशासनका अनुसार उक्त रिटमाथि सुनुवाइका लागि कात्तिक ३० गतेको मिति निर्धारण गरिएको हो।
यसअघि अध्ययनका क्रममा रहेको भन्दै बिहीबार रिट दर्ता हुन नसकेको बताइएको थियो। आवश्यक प्रक्रिया पूरा भएपछि बिहीबार नै निवेदन दर्ता गरिएको हो।
सरकारले कार्कीलाई प्रहरी महानिरीक्षकको जिम्मेवारीबाट हटाएर प्रधानमन्त्रीको सुरक्षा सल्लाहकार नियुक्त गरेको छ। तर, कार्कीले मन्त्रिपरिषद्को निर्णयसम्बन्धी पत्र भने बुझिसकेका छैनन्।
आफूलाई पदबाट हटाउने सरकारी निर्णय कानुनविपरीत रहेको दाबी गर्दै कार्की अदालत पुगेका हुन्। अब सर्वोच्च अदालतमा हुने सुनुवाइबाट यस विवादमा न्यायिक प्रक्रिया अघि बढ्नेछ।
