रौतहट । नगरप्रमुख र प्रमुख प्रशासकीय अधिकृतबीचको असमझदारी बढ्दै जाँदा रौतहटका विभिन्न स्थानीय तहमा सेवा प्रवाह र विकास निर्माणका काम प्रभावित भएका छन् । कतै कर्मचारीले महिनौँदेखि तलब पाएका छैनन् भने कतै विकास योजनाको काम अघि बढ्न सकेको छैन ।
कटहरिया नगरपालिकामा तलब माग गर्दै करार कर्मचारीले असोज २३ गतेदेखि लगाएको ताला सोमबार खुलेको छ । छिट्टै तलब भुक्तानी गर्ने सहमतिपछि कार्यालयको ताला खोलिएको हो । लामो समयको बन्दका कारण कर्मचारीको पारिश्रमिक, सामाजिक सुरक्षा भत्ता वितरण र सरसफाइ सेवासमेत प्रभावित भएका थिए । नगरपालिकामा करिब चार करोड रुपैयाँ बराबरका योजनाको भुक्तानी बाँकी रहेको नगरप्रमुख अजयप्रकाशले बताएका छन् ।
कटहरियामा नगरप्रमुख अजयप्रकाश र प्रमुख प्रशासकीय अधिकृत कमल ज्ञवालीबीच पनि विवाद देखिएको छ । यस्तै, गौर नगरपालिकामा नगरप्रमुख शम्भु साहले प्रमुख प्रशासकीय अधिकृत विष्णुप्रसाद पौडेल नियमित कार्यालय नबस्ने र विकास योजनाको काम अघि नबढाएको आरोप लगाएका छन् । तर पौडेलले आफूले नियम र कानुनअनुसार काम गरिरहेको तथा योजनाका सम्झौता र भुक्तानी भइरहेको दाबी गरेका छन् ।
कटहरिया, गौर, वृन्दावन, देवाही गोनाही र फतुवा विजयपुरलगायत जिल्लाका विभिन्न पालिकामा जनप्रतिनिधि र प्रशासनिक नेतृत्वबीच समन्वयको अभाव देखिएको छ । कटहरियामा पछिल्लो ६ महिनामै तीन जना प्रमुख प्रशासकीय अधिकृत परिवर्तन भएका छन् ।
प्रमुख प्रशासकीय अधिकृतको बारम्बार सरुवा र जनप्रतिनिधि तथा कर्मचारीबीचको अविश्वासले स्थानीय तहको कामकाज प्रभावित भएको जनप्रतिनिधिहरूको भनाइ छ । उता, प्रशासनिक अधिकारीहरूले भने नियमविपरीत काम गर्न नसकिने र आर्थिक अनुशासन कायम राखेर मात्र निर्णय गर्ने अडान लिएका छन् ।
स्थानीय तहमा देखिएको समस्याबारे सङ्घीय मामिला तथा सामान्य प्रशासन मन्त्रालयको पनि ध्यानाकर्षण भएको छ । मन्त्रालयका प्रवक्ता गणेशप्रसाद भट्टले सम्बन्धित पक्षसँग छलफल गरेर समस्या समाधानका लागि पहल भइरहेको बताएका छन् ।
जनप्रतिनिधि र प्रशासनिक नेतृत्वबीचको विवादका कारण सर्वसाधारणले पाउनुपर्ने सेवा, बजेट कार्यान्वयन र विकास निर्माण प्रभावित भइरहेकाले आपसी समन्वय र समस्याको तथ्यगत समीक्षा आवश्यक देखिएको छ ।
