कलैया,बाराको कलैया उपमहानगरपालिकाले आगामी शैक्षिक सत्र २०८३ का लागि विद्यार्थी भर्ना अभियान तथा विद्यालय सञ्चालन सम्बन्धी नयाँ कार्यतालिका सार्वजनिक गरेको छ ।नगर प्रमुखको आदेशानुसार नगरपालिकाको शिक्षा, युवा तथा खेलकुद शाखाले आज एक सूचना जारी गर्दै नगर क्षेत्रका सम्पूर्ण सामुदायिक तथा संस्थागत विद्यालयहरूलाई नयाँ सत्रको तयारीका लागि निर्देशन दिएको हो ।
उपमहानगरपालिकाका शिक्षा शाखा प्रमुख राजीवकुमार यादवद्वारा हस्ताक्षरित सूचनामा वैशाख १६ गतेदेखि नगरका सबै सामुदायिक र संस्थागत विद्यालयहरूमा नियमित रूपमा पठनपाठन सञ्चालन गर्नुपर्ने उल्लेख छ । यसअघि वैशाख ४ गते शुक्रबार जारी गरिएको सूचनामा वैशाख १५ गतेदेखि भर्ना अभियान र वैशाख २१ गतेदेखि कक्षा सञ्चालन हुने उल्लेख गरिएको थियो ।नयाँ सूचना अनुसार शैक्षिक सत्र २०८३ का लागि विद्यालयहरुले वैशाख १५ गतेसम्म विद्यार्थी भर्ना अभियान सञ्चालन गरिसक्नुपर्ने छ ।
सोही अवधिभित्र विद्यालयहरूले विद्यार्थी अभिलेखीकरण, वार्षिक कार्यतालिका निर्माण, वार्षिक कार्ययोजना तर्जुमा, शिक्षक क्षमता विकास कार्यक्रम र विद्यालय सुधार योजना निर्माण जस्ता प्राविधिक तथा प्रशासनिक कार्यहरू अनिवार्य रूपमा सम्पन्न गर्नुपर्ने सूचनामा जनाइएको छ ।
