निजगढ,बारा क्षेत्र नम्बर १ मा नेकपा एमालेबाट प्रतिनिधि सभा सदस्यमा निर्वाचित अच्युत मैनाली र प्रदेश सभा सदस्य त्रिलोकी चौधरीले मंगलवार निजगढमा मतदाता भेटघाट तथा विजय र्याली गर्नुभएको छ ।
गत मंसिर ४ गते भएको निर्वाचनमा विजयी भएपछि सांसद मैनाली र चौधरीले सोमवारबाट निजगढमा मतदाता भेटघाट कार्यक्रम सुरु गर्नुभएको हो । सांसद मैनाली र चौधरीसहित एमालेका नेता कार्यकर्ताको टोलीले निजगढ नगरपालिका वडा नम्बर १, २, ३, ४, ५, ६ र ७ का मतदाता र पार्टी कार्यकर्ताहरुसंग भेटघाट गरेको नेकपा एमाले निजगढ नगर कमिटी सचिव तिलक घलानले जानकारी दिनुभयो । घलानका अनुसार नगरका विभिन्न वडाका टोलमा भेला भएका मतदाताहरुले नवनिर्वाचित जनप्रतिनिधिहरुलाई फूल, माला र अवीर लगाएर स्वागत गरेका थिए ।
टोलीले मंगलवार निजगगढ वडा नम्बर १०, ११, १२ र १३ नम्बरमा मतदातासंग भेटघाट गरेर विजय र्याली गर्ने कार्यक्रम रहेको छ । यसअघि मैनालीसहित मधेस प्रदेश सभा १ का सदस्य चौधरी र २ का सदस्य सरोज यादवको टोलीले सिम्रौनगढ र कोल्हबी नगरपालिका तथा आदर्शकोतवाल र बारागढी गाउँपालिकामा विजय र्याली निकालेको थियो ।
