काठमाडौँ । भारतीय सेनाले बुधबार राति ‘अपरेशन सिन्दूर’ अन्तर्गत पाकिस्तान र पाकिस्तान अधिनस्थ जम्मू कश्मीरमा रहेका ‘आतंकवादी’ शिविरहरूमा एयर स्ट्राइक गरेको छ।
२२ अप्रिलमा कश्मीरको पहलगाममा हमला भएको थियो। यसमा एक नेपालीसहित २६ पर्यटकको मृत्यु भएको थियो। आक्रमणकारीहरुले पर्यटकहरूलाई उनीहरूको धर्म सोधेपछि गोली हानेको बताइएको छ ।
अप्रिल २३ मा भारतीय विदेश सचिव विक्रम मिश्रीले पाकिस्तानी नागरिकहरूको १४ श्रेणीको भिसा रद्द गरिएको बताएका थिए। सार्क भिसा धारकहरूलाई अप्रिल २६ सम्ममा भारत छोड्न भनिएको थियो भने मेडिकल भिसा धारकहरूलाई अप्रिल २९ सम्ममा भारत छोड्न आदेश दिइएको थियो। बाँकी १२ श्रेणीका भिसा धारकहरूलाई अप्रिल २७ सम्मको समय दिइएको थियो।
यसैबीच अर्को भारतीय सञ्चारमाध्यम एबीपी न्युजले भारतीय सेनाले पहलगाममा भएको हमलाको बदला लिएको समाचारमा उल्लेख गरेको छ ।
यसैबीच पाकिस्तानी सञ्चार सेवाका महानिर्देशक लेफ्टिनेन्ट जनरल अहमद शरीफ चौधरीले भारतले कोटली, बहावलपुर र मुजफ्फराबादमा “कायरतापूर्ण आक्रमण” गर्दै मध्यरातपछिको समयमा मिसाइल आक्रमण गरेको बताएका छन् ।
