वीरगन्ज,सशस्त्र प्रहरीले पर्साबाट बन्दुकसहित ३ जनालाई पक्रेको छ । पर्सागढी नगरपालिका वडा नम्बर– ५ बस्ने ४१ वर्षीय प्रेम ठाकुर, ५५ वर्षीय रामजी ठाकुर र एक १६ वर्षीय युवक पक्राउ परेका हुन् ।
उनीहरुको साथबाट सुपर क्वालिटी लङ रेञ्ज लेखिएको दुई नाले बन्दुक १ थान, बन्दुकमा लाग्ने कार्टिज १ थानसमेत बरामद भएको सशस्त्र प्रहरी बल १३ नम्बर हेड क्वार्टर पर्साका प्रमुख तेजप्रसाद पोखरेलले जानकारी दिनुभयो ।
जिल्लाको सबैठवाबाट ना. ५७ प ३६२८ नम्बरको मोटरसाइकलमा पर्सागढीतर्फ जाँदै गर्दा पर्साको विन्दवासिनी गाउँपालिका वडा नम्बर– ३ नहरचोकबाट बिहीबार बिहान ९ बजे उनीहरु बन्दुक सहित पक्राउ परेका उहाँले जानकारी दिनुभयो ।
हतियार, मोटरसाइकलसहित पक्राउ परेका तीनै जनालाई आवश्यक कारबाहीको लागि जिल्ला प्रहरी कार्यालय पर्सामा बुझाइएको छ ।
