बरियारपुर,बारामा बुधबार राति भएको सवारी दुर्घटनामा पर्सा जिल्ला घर भएका एक जना प्रहरी सहायक निरीक्षकको मृत्यु भएको छ । बाराको महागढी नगरपालिका वडा नम्बर २ स्थित भुतही पुल नजिक बुधबार राति सवा नौ बजे प्रदेश २–०३–००१ ख.०७१५ नम्बरको ट्रकले स.५ प.९५३७ नम्बरको मोटरसाइकललाइ ठक्कर दिएको थियो । उक्त दुर्घटनामा मोटरसाइकल चालक पर्साको सखुवा प्रसौनी गाउपालिका ६ घर भइ रौतहटको इलाका प्रहरी कार्यालय सन्तपुरमा कार्यरत प्रहरी सहायक निरीक्षक ४४ वर्षिय रमेशकुमार राउतको घटनास्थलमै मृत्यु भएको हो । रौतहट सन्तपुरस्थित प्रहरी कार्यालयबाट बुधबार राति मोटरसाइकलमा आफनो घर फर्किदै गरेका बेला राउत सवार रहेको मोटरसाइकललाई ट्रकले ठक्कर दिएको थियो । शव पोष्टमार्टमका लागि जिल्ला अस्पताल कलैयामा पठाइएको र ट्रक सहित चालकलाइ नियन्त्रणमा लिइएको बाराका प्रहरी प्रवक्ता प्रहरी नायव उपरिक्षक गौतम मिश्रले जानकारी दिनुुभयो ।
