नरेश गुप्ता
बरियारपुर – बाराको पचरौता नगरपालिका १ पिपरपाती स्थित एक पुरुषमा थप कोरोनाको संक्रमण भेटिएको छ । यो संगै बारामा कोरोना संक्रमितको संख्या ५ पुगेको छ ।
बाराको कलैया अस्पतालमा एक जना प्रहरी जवान , एक जना पत्रकार र पचरौताबाट बिहीवार ल्याईएको पुरुषको आईसोलेसनमा उपचार भैइरहेको बाराको प्रहरी प्रवक्ता गौतम मिश्रले जानकारी दिए । पचरौता नपा १ निवासी पुरुष भारतबाट आएको र उनी कोरोना पोजेटिभ रहेको पुष्टि भएको कलैया अस्पताल श्रोतले जनाएको छ ।
बाराको सिमावर्ती क्षेत्र पचरौता निवासी संक्रमित ब्यक्तिको सम्पर्कमा आएको सबैलाई क्वारेन्टाइन गरिने प्रहरी प्रवक्ता मिश्रले बताए । बाराको विभिन्न स्थानीय तहमा बनाईएको क्वारेन्टाइनमा बिहीवार सम्म ४१५ जनालाई क्वारेन्टाइनमा राखिएको छ ।
छिमेकी देश भारतबाट नेपाल आउने मजदुरहरुलाई सिमार्वती क्षेत्रमा बढी निगरानी गरिएको छ । कोरोना कोभिड १९ को रोकथामको लागि जिल्ला प्रशासन कार्यालय बाराले जेठ २० गते सम्मको लागि सिमा क्षेत्रमा आवतजावतमा निशेधज्ञा जारी गरिएको छ ।
