कलैया,बारामा ट्रकले मोटरसाइकललाई ठक्कर दिँदा मोटरसाइकल चालकको मृत्यु भएको छ । ट्रकको ठक्करबाट मोटरसाइकल चालक सर्लाहीको ईश्वरपुर नगरपालिका–६ बैलबास बस्ने ४० वर्षीय नरेन्द्र सिंहको मृत्यु भएको प्रहरीले जनाएको छ । बाराको कलैया उप महानगरपालिका–२५ सिसहनिया चौकमा वीरगन्जबाट कलैयातर्फ जाँदै गरेको ना.४ ख ६९६ नम्बरको ट्रकले सिंहले चलाएको ना ४७ प ८३४३ नम्बरको मोटरसाइकललाई ठक्कर दिँदा उनी गम्भीर घाइते भएका थिए । घाइते भएका सिंहलाई उपचारको लागि अस्पताल लैजाने क्रममा बाटोमा नै मृत्यु भएको बाराका प्रहरी प्रवक्ता एवम् प्रहरी नायब उपरीक्षक गौतम मिश्रले जानकारी दिनुभयो । ट्रक चालक बाराको जीतपुरसिमरा उपमहानगरपालिका– ११ फत्तेपुर बस्ने लक्ष्मी नारायण सहनीलाई नियन्त्रणमा लिई थप अनुसन्धान भइरहेको मिश्रले बताउनुभयो ।
यसैबीच रौतहटको देवाही गोनाही नगरपालिकामा सोमबार राति ट्याक्टर दुर्घटना हुँदा दुई जनाको मृत्यु भएको छ । ना ४ त १५०७ नम्बरको ट्याक्टर राति १२ बजेको समयमा देवाही गोनाही नगरपालिका–४ स्थित लालबकैया नदीको बाँधमा दुर्घटना भएको हो । दुर्घटनामा ट्याक्टरमा सवार ४ जनामध्ये कवीन्द्र पटेल र गोविन्दा पटेलको घटनास्थलमै मृत्यु भएको प्रहरीले जनाएको छ । दुर्घटनामा घाइते भएका राकेश पटेलको अवस्था पनि गम्भीर रहेको र उनलाई थप उपचारका लागि वीरगन्ज ल्याइएको प्रहरीले जनाएको छ । खेत जोतेर घर फर्किँदै गरेको ट्याक्टर अनिन्त्रित भएर दुर्घटना हुँदा दुई पटेलद्वयको त्यही ट्याक्टरले च्यापिएर मृत्यु भएको हो ।
