नरेश गुप्ता
बरियारपुर,बाराको पचरौता नगरपालिकास्थित सशस्त्र प्रहरीको पिपरपाति बिओपीले ठुलो परिमाणमा लागूऔषध बरामद गरेको छ ।
सशस्त्र प्रहरी बल नेपाल बिओपी पिपरपातिका प्रहरी निरीक्षक कमल पन्थीको नेतृत्वमा खटिएको मोवाइल गस्ति टोलीले भारतबाट अवैध रुपमा बिआर ०५ एक्स ०६७६ नम्बरको भारतीय मोटरसाइकलमा नेपालतर्फ ल्याउदै गरेको अवस्थामा नुर्फिन १ हजार ५० पिस, डाइजेपाम १ हजार ५० पिस, प्रोमेथाजाइन १ हजार ५० पिस गरी जम्मा ३ हजार १ सय ५० पिस लागुऔषध बरामद गरेको सशस्त्र प्रहरी बल नेपाल १२ नम्बर गण हेड क्वाटरका प्रमुख सशस्त्र प्रहरी उपरीक्षक रविनराज कर्णजीतले बताउनुभयो । लागूऔषध कारोबारी भने प्रहरीलाई देख्ने बित्तिकै मोटरसाइकल छोडेर फरार भएको हुँदा निजहरुको खोजी जारी राखिएको सशस्त्र प्रहरीले जनाएको छ । मोटरसाइकल प्रयोग गरी लागूऔषध ओसारपसार भइरहेको सूचनाको आधारमा सिमा नाकामा प्रहरीले कडाइ गर्नुका साथै निगरानी बढाइएको कर्णजीतको भनाइ छ ।
