राजनकुमार बानिया
पोखरिया, १ भदौँ– पर्साको छिपहरमाई गाउँपालिका वार्ड नं– २ चारगाहाको एक घरमा लुकाइ राखेको अवस्थामा प्रहरीले सोमबार भारतीय नम्बर प्लेटको एउटा स्कारपियो र मोटरसाइकल बरामद गरेको छ ।
प्रहरी चौकी टिहुकीका प्रहरी सहायक निरिक्षक पवन झाको नेतृत्वमा गएको टोलीले चरगाहा गाउँका प्रेमी साहको घरमा छापामारी बिआर ३२ पिए २३०६ नम्बरको स्कारपियो र बिआर २२ पिए ४४८६ नम्बरको मोटरसाईकल बरामद गरेको हो ।
साहले भन्सारबाट अनुमति नलिइ प्रयोग गर्दै आएको सुचनाको आधारमा प्रहरीले घरमा छापामारी गरी सवारी साधन नियन्त्रणमा लिएको हो ।
बरामद स्कारपियो र मोटरसाइकल जिल्ला प्रहरी कार्यालय पर्सामा बुझाइएको सहायक निरीक्षक झाले जानकारी दिनुभयो । प्रहरीले आईतबार साहको छोरा सतेन्द्रकुमार गुप्तालाई पनि स्रोत नखुलेको तीन लाख नगदसहित नियन्त्रणमा लिएर ईलाका प्रहरी कार्यालय पोखरियामा बुझाएको थियोे ।
