कृपा संवाददाता
काठमाडौं – महानगरीय ट्राफिक प्रहरी महाशाखाले चर्काे जरिवाना असुल्न कार्य अगाडी बढाएकाे छ । उपत्यकाका दुई सय स्थानमा दश हजार रुपैयाँ जरिवाना तिराउने लेखिएका बोर्ड टाँसिए पनि कारण भने खुलाइएको छैन भन्ने खबर नागरीक न्यूजले प्रकाशित गरेकाे छ । दश हजार रुपैयाँ जरिवाना तिराउने लेखिएका बोर्ड टाँसिएका कारण सवारी चालक नै ससंकीत भएका छन् ।
सवारी तथा यातायात ऐन २०४९ मा अर्कै नम्बर प्लेट राखी सवारी चलाउनेलाई ६ महीनासम्म कैद र पाँचदेखि १५ हजार रुपैयाँसम्म जरिवाना तिराउने व्यवस्था छ । चालकलाई सचेत बनाउने भन्दै महाशाखाले यही कानुनका आधारमा चर्काे जरिवाना शुल्क उठाउन थालेको हो । सवारी साधनको पार्टपूर्जा परिवर्तन (मोडिफाइड) गर्ने, स्टिकर टाँस्ने, तिव्रगतीमा लगायतलाई पनि महाखाशाले यसै कानुनभित्र रहेर कारबाही सुरु गरेको हो।
ऐनको परिच्छेद–१० मा सजाय सम्बन्धी व्यवस्थाअनुसार ट्राफिक संकेत उलंघन गर्ने, निषेध गरिएको ठाउँमा सवारी रोक्ने, साइडलाइट नबाल्ने, गलत साइड र एकतर्फी सडकमा सवारी चलाउने, मादक पदार्थ सेवन गरेर सवारी चलाउनले लगायत नियम उल्लंघन गरेमा पाँचसयदेखि एक हजार पाँच सयसम्म जरिवाना तिराउने व्यवस्था छ । तर अहिले उपत्यकामा सानाे गल्ती गर्नेलाइ पनि दश हजार रुपैयाँ जरिवाना तिराउने गरेकाे छ ।
पहिलो पटक नियम उल्लंघन गर्नेलाई पाँच सय रुपैयाँ, दोस्रो पटक उलंघन गर्नेलाई एक हजार रुपैयाँ र तेस्रो पटक वा सोभन्दा बढी पटक उलंघन गर्नेलाई एक हजार पाँच सय रुपैयाँ जरिवाना गर्ने व्यवस्था रहेकाे छ । महाशाखाका एसएसपी भीमप्रसाद ढकालले उपत्यकाभर ट्राफिक उल्लंघन गर्नेलाई जरिवानाको शिर्षक हेरेर कारबाही गरिने बताए । मोडिफाइड गरिएका सवारी गुडाउनेलाई प्रहरीले अनिवार्य १० हजार जरिवाना तिराउने उनले बताए ।
जरिवानका साथै एक घण्टा सचेतना कक्षा समेत दिने बताइएको छ। चालकलाई सचेत र जरिवानाबाट बचाउनको लागि ठाउँठाउँमा जरिवाना लेखिएका बोर्ड राखिएको प्रहरीले जानकारी दिएको छ। ‘हाम्रो उद्देश्य दश हजार नै तिराउने होइन, चालकलाई जिम्मेवार र होसियार बनाउनु हो,’ उनले भने, ‘दुई महिनायता यो नियम कार्यान्वयन गराउन थालेका छौं अहिले व्यवस्थित हुँदै गएको छ । सबै चालक होसियार भएका छन् नियम उलंघन गर्ने केही कारबाहीमा पनि परेका छन् ।
नियम पूर्णरूपमा लागु भएको ठाउँमा बोर्ड राखेर जानकारी गराइएको प्रहरीले बताएको छ । चालकलाई लचिलो कारबाही तथा सामान्य जरिवाना गर्दा नियम उलंघनका घटनामा कमी नआएपछि सवारी तथा यातायात ऐन २०४९ लाई टेकेर अधिकतम् जरिवानाको सुरुवात गरिएको एसएसपी ढकालले बताए ।
