तेलअभिभ । इजरायलको संसदीय निर्वाचनमा प्रधानमन्त्री बेन्जामिन नेतान्याहुको गठबन्धनले बहुमत गुमाएपछि राजनीतिक विवाद चर्किएको छ। निर्वाचनपछि विदेशी हस्तक्षेप र मत खरिदको आरोप लगाएसँगै नेतान्याहुको विपक्षी दल तथा अरब समुदायका नेताहरूले उनको चर्को आलोचना गरेका छन्।
नेतान्याहुको पार्टी लिकुडले अरब नेतृत्वका राजनीतिक दलहरूले निर्वाचनमा मत खरिद गरेको आरोप लगाएपछि इजरायलको आन्तरिक सुरक्षा निकाय शिन बेटले कतार र टर्कीबाट अवैध आर्थिक सहयोग आएको हुन सक्ने विषयमा अनुसन्धान थालेको छ।
तर, कतारले आरोपलाई निराधार भन्दै अस्वीकार गरेको छ। निर्वाचन समितिका कार्यवाहक महानिर्देशक डिन लिभ्नेले पनि निर्वाचनमा अनियमितता भएको आरोपको कुनै आधार नरहेको बताएका छन्।
निर्वाचन परिणामअनुसार नेतान्याहुको गठबन्धनले ५३ सिट र प्रमुख विपक्षी नेता गादी आइजेनकोटको गठबन्धनले ४८ सिट जितेका छन्। अरब नेतृत्वका दुई दल जोइन्ट लिस्ट र रामले संयुक्त रूपमा १९ सिट प्राप्त गरेका छन्।
१२० सदस्यीय संसद् नेसेटमा कुनै पनि गठबन्धनले बहुमत प्राप्त गर्न नसकेपछि सरकार गठनमा अरब दल निर्णायक बनेका छन्।
विपक्षी नेता आइजेनकोटले निर्वाचनपछि राजनीतिक वातावरण प्रभावित पार्ने प्रयास गरेको भन्दै नेतान्याहुको आलोचना गरेका छन्। आलोचकहरूले विदेशी हस्तक्षेपको आरोपलाई अरब राजनीतिक दलको वैधता कमजोर पार्ने प्रयासका रूपमा व्याख्या गरेका छन्।
निर्वाचन परिणामले इजरायलमा नयाँ सरकार गठनको समीकरण थप जटिल बनाएको छ।
