वीरगन्ज, १७ फागुन
उद्योगबाट निस्केको छाई (भुसको खरानी) सिर्सिया नदीमा फाल्ने ३ वटा ट्याक्टरलाई वीरगन्ज महानगरले नियन्त्रणमा लिएर कारबाही गरेको छ ।
वीरगन्जको वडा नम्वर २१ मा सिर्सिया नदीमा फोहोर फालिरहेको अवस्थामा फेला परेका ३ वटा ट्याक्टरलाई नियन्त्रणमा लिएर कारबाही गरिएको हो ।
कारबाहीमा पर्नेमा प्र २-०३-००१ त ४८७, ना १८ त ६८८९ र ना ७ त ५३८९ रहेको महानगरपालिकाले जनाएको छ ।
तीनै वटा ट्याक्टरलाई महानगरले बिहान नियन्त्रणमा लिएर बालमन्दिरमा राखेको थियो । तीनै वटै ट्याक्टरका चालकलाई पहिलो पटक १-१ हजार जरिबाना गरेर छाडिएको छ । महानगरपालिकाले सिर्सिया नदी प्रदुषण नियन्त्रण अभियान चलाइरहेको अवस्थामा नदी प्रदुषण गर्ने जो कसैलाई पनि कारबाही गर्ने रणनीति अनुसार नदीमा फोहोर गर्नेलाई बुधवारबाट जरिबाना गर्न सुरु गरेको हो ।
नदी प्रदुषण नियन्त्रणका लागि महानगरले समिति नै बनाएर अनुगमनलाई समेत तीव्रता दिएको छ । नदी तटमा रहेका उद्योगहरुले त्यहाँबाट निस्कने फोहोर जथाभावी फालिदिँदा सिर्सिया नदी प्रदुषित हुने गरेको छ । महानगरले उद्योगहरुलाई पनि कारबाही गर्ने तयारी अनुरुप मरियम लेदर सहित ५ वटा उद्योगलाई पत्र नै पठाएर चेतावनी दिएको छ ।
यस क्षेत्रमा रहेका उद्योगकै कारण सिर्सिया नदी प्रदुषण हुँदै आएको छ । नियन्त्रणमा लिइएका ट्याक्टरलाई चेतावनी स्वरुप कारबाही गरिएको र आउँदा दिनमा फोहोर पानी सोझै नदीमा मिसाउने उद्योगलाई पनि कारबाही गरिने महानगर प्रमुख राजेशमान सिंहले बताउनुभयो ।
