वीरगञ्ज,वीरगञ्जस्थित ठाकुरराम बहुमुखी क्याम्पसको परीक्षा केन्द्र अन्यत्र सारिएको विषयलाई लिएर उत्पन्न समस्याका बारेमा शनिवार सर्वपक्षीय बैठक बसेर छलफल गरिएको छ ।वीरगञ्जको होटेल मकालुमा बसेको सर्वपक्षीय बैठकले परीक्षा केन्द्र अन्य जिल्लामा सारिएको विषयलगायत ठाकुरराम बहुमुखी क्याम्पसमा देखिएको अन्य समस्या समाधानका लागि संयुक्त पहल गर्ने निर्णय गरेको छ ।बैठकले त्रिभुवन विश्वविद्यालयले अन्य जिल्लामा सारेको परीक्षा केन्द्र पुनः ठाकुरम बहुमुखी क्याम्पसमै फिर्ता ल्याउन त्रिभुवन विश्वविद्यालयका केन्द्रीय प्रतिनिधिसँग छलफल गरेर निष्कर्षमा पुग्ने निर्णय गरेको बैठकमा सहभागी क्याम्पस प्रमुख रञ्जितप्रसाद यादवले जानकारी दिनुभयो ।त्यसअघि बैठकमा भएको छलफलका क्रममा बोल्दै नेपाली काङ्ग्रेस पर्साका जिल्ला सभापति जनार्दन सिंह क्षेत्रीले नेपालकै शैक्षिक धरोहरका रूपमा रहेको ठाकुरराम बहुमुखी क्याम्पसको परीक्षा केन्द्र अन्यत्र सारेर त्रिभुवन विश्वविद्यालयले हेपाहा प्रवृत्ति देखाएको आरोप लगाउनुभयो । उहाँले कुनै एउटा कालखण्डमा भएको घटनालाई नजिर बनाएर ठाकुरराम क्याम्पसको परीक्षा केन्द्र अन्यत्र सार्नु खेदजनक भएको टिप्पणी गर्नुभयो ।बैठकमा नेकपा एकीकृत समाजवादीका जिल्ला अध्यक्ष बालगोपाल थापाले स्नातकोत्तर तहको परीक्षा ठाकुरराम क्याम्पसमै हुने तर अन्य तहको परीक्षा अरू जिल्लाको क्याम्पसमा तोक्ने त्रिभुवन विश्वविद्यालयको कदम गलत भएको धारणा राख्नुभएको थियो । उहाँले परीक्षा केन्द्र अन्य जिल्लामा सारेर त्रिभुवन विश्वविद्यालयले पर्साका राजनीतिक दलहरूलाई हेपेको पुष्टि भएको बताउनुभयो ।बैठकमै सहभागी जनता समाजवादी पार्टी (जसपा) नेपालका जिल्ला अध्यक्ष रामनरेश प्रसाद यादवले पनि त्रिभुवन विश्वविद्यालयले ठाकुरराम क्याम्पस र यहाँ अध्ययनरत विद्यार्थीसँग विभेद गरेको बताउनुभयो । त्यसका विरुद्धमा जिल्लास्थित राजनीतिक दलहरू एकजुट भएर अगाडि बढ्नुपर्ने आवश्यकता भएको उहाँले औँल्याउनुभयो ।बैठकमा नेकपा एमालेका जिल्ला संयोजक डाक्टर विश्वम्भर शर्मा, लोसपाका नेता निजामुदिन समानी, जसपाका जिल्ला सचिव तबरेज अहमद, नागरिक उन्मुक्ति पार्टीका जिल्ला सहसचिव अमित गौरो, राप्रपाका जिल्ला सचिव पन्नालाल पटेल, ठाकुरराम बहुमुखीका क्याम्पस प्रमुख रञ्जितप्रसाद यादव, सहायक क्याम्पस प्रमुख अनिलकुमार रमणलगायतको सहभागिता थियो ।
