निजगढ, १३ भदौँ– निजगढ नगरपालिकाकी ४७ वर्षकी एक संक्रमित महिलाको शनिबार निधन भएको छ ।
उनको चितवन मेडिकल कलेज (सीएमसी)को शिक्षण अस्पतालमा शनिबार बिहान मृत्यु भएको अस्पतालका निर्देशक डा.दयाराम लम्सालले जानकारी दिनुभयो । बिहान सात बजेर ५३ मिनेट जाँदा ती महिलाको मृत्यु भएको अस्पतालले जनाएको छ ।
निजगढ नगरपालिका वडा नम्बर ८ घर भएकी उनी जागिरको क्रममा लामो समयदेखि हेटौडा बस्दै आएकी थिइन । मृृतक हेटौडा नवलपुरस्थित निर्मल माध्यमिक विद्यालयकी शिक्षिका हुन । उनी मिर्गौलासम्बन्धी रोगले पीडित रहेको अस्पतालले बताएको छ । साउन २६ गते सीएमसीमा भर्ना भएर उनको डायलसिस भइरहेको थियो । श्वासप्रश्वासमा जटिलता देखिएपछि परीक्षण गरेर
हेर्दा कोरोना संक्रमण पुष्टि भएको थियो । यसैबीच निजगढ नगरपालिका स्वास्थ्य शाखा प्रमुख रमेश लामाले कन्ट्याक्ट टेसिङ्गको आधारमा मृतक महिलाको सम्पर्कमा आएका निजगढका ४ जनालाई होम आइसोलेशनमा बस्ने व्यवस्था मिलाएको जानकारी दिनुभएको छ ।
उपचारको क्रममा मृतकलाई भेटन चितवन पुगेको परिवारका सदस्यहरुको पहिचान गरी आइसोलेशनमा राखिएको शाखा प्रमुख लामाले बताउनुभयो ।
