बारा, ३१ भदौं । जेनजी आन्दोलनका कारण हाल मुलुकका विभिन्न स्थानहरू तनावग्रस्त बनेका छन्। आन्दोलनकै नाममा निजी तथा सार्वजनिक सम्पत्तिमा क्षति पुगेको समाचारहरू दैनिक रूपमा सार्वजनिक भइरहेका छन्। यसैबीच उपराष्ट्रपति रामसहाय प्रसाद यादवको बाराको कलैयास्थित घरसमेत लुटपाट र तोडफोडको शिकार भएको छ।
उपराष्ट्रपति यादवका छोरा शत्रुधन यादवका अनुसार जेनजी आन्दोलनकारी नभई छुट्टै समूहका लुटेराले घरमा हमला गरेका हुन्। घर तोडफोड गरेर बिहेको तयारीका लागि राखिएका सुनचाँदीका गरगहना, नगद रकम सबै चोरी भएको छ। गाउँबाट ल्याएर राखिएका धान, गहुँ, मुसुरो जस्ता अन्नपात पनि जलाइदिएका छन्।
उपराष्ट्रपति यादवकी छोरीको बिहे मंसिर ८ गते तय भएको हुँदा लुटपाटको असर परिवारको व्यक्तिगत जीवनमा ठूलो संकट बनेको छ। घरमा भएको तोडफोडपछि उपराष्ट्रपतिकी पत्नी चम्पादेवी यादव मानसिक आघातमा परेकी छन् भने छोरा शत्रुधन अस्पतालमै उपचाररत छन्। गत मंगलबार जेनजी आन्दोलनकै क्रममा पूर्वमन्त्री किसान श्रेष्ठ, ज्वालाकुमारी साह लगायतका नेताहरूको घरमा समेत आगजनी र तोडफोड भएको थियो।
बाराको विश्रामपुर गाउँपालिकाको भवन र सवारी साधन, निजगढ नगरपालिका, सिमरा आन्तरिक राजस्व कार्यालय, जीतपुरसिमरा उपमहानगर कार्यालय,
नगरप्रमुख र ईलाका प्रशासन कार्यालयका सवारी साधन, निजगढ नगरपालिका अन्तर्गत ८ वटा वडा कार्यालय, जीतपुरसिमरा अन्तर्गत ६ वटा वडा कार्यालय जस्ता संरचनाहरू ध्वस्त भएका छन्।
जिल्ला प्रहरी कार्यालय बाराका प्रहरी उपरीक्षक सन्तोष तामाङका अनुसार घटनामा संलग्नलाई फोटो–भिडियोका आधारमा पहिचान गरेर कारबाही गरिनेछ। तत्काल कारबाही नगरे राज्यलाई झन ठूलो दुर्घटना र बदलाको भावना निम्त्याउन सक्ने चेतावनी पनि दिएका छन्।
उपराष्ट्रपतिको परिवारमा गहिरो आघात परेको छ। छोरीको बिहेका लागि लामो समयदेखि गरिएको तयारी एकैपटक ध्वस्त भएको छ। उच्च पदस्थ नेताको घरमै यसरी तोडफोड र लुटपाट हुनु राज्य संयन्त्र कमजोर भएको संकेत हो। आन्दोलनलाई ढाल बनाएर आपराधिक समूह सक्रिय भएको देखिन्छ।
निजी तथा सार्वजनिक सम्पत्तिमा भएको क्षति ठूलो आर्थिक बोझ बन्नेछ। सुरक्षाकर्मीको भरपर्दो भूमिका र कानुनी कारबाहीको विश्वसनीयता परीक्षणमा परेको छ। आन्दोलन र आपराधिक गतिविधिबीच छुट्याउने चुनौती गम्भीर बनेको छ। आन्दोलनकारीको माग र असन्तुष्टिलाई सम्बोधन गर्ने प्रक्रिया भन्दा बढी हिंसात्मक गतिविधिले आन्दोलनको उद्देश्यलाई कमजोर बनाइरहेको छ। उच्च राजनीतिक व्यक्तित्वसमेत असुरक्षित देखिनु राज्य संयन्त्रप्रति नागरिक विश्वास कमजोर हुने अर्को कारण हो।
जेनजी आन्दोलनको आडमा भइरहेको लुटपाट, तोडफोड र आगजनी केवल तत्कालीन क्षति मात्र होइन, भविष्यमा समाजमा भय, अविश्वास र विभाजन बढाउने खतरासमेत बोकेको छ। उपराष्ट्रपति यादवको परिवारमा परेको व्यक्तिगत पीडा मुलुककै राजनीतिक अस्थिरता र शिथिल प्रशासनिक संयन्त्रको प्रतिबिम्ब हो।
