वीरगञ्ज,घरमा जडान गरिएका चापाकलबाट पानी आउन छोडेपछि खानेपानीको संकट बेहोर्दैै आएको वीरगञ्ज महानगरपालिकासहित पर्सा जिल्लालाई सुक्खाग्रस्त क्षेत्र घोषणा गरी विशेष राहत प्याकेज संचालन गर्न स्थानीय आठवटा राजनीतिक दलले संघीय सरकारसँग माग गरेका छन्।मंगलवार वीरगञ्जमा बसेको सर्वदलीय बैठकले वीरगञ्ज महानगर र पर्सा जिल्लालाई सुक्खाग्रस्त क्षेत्र घोषणा गर्न र राहत प्याकेज उपलब्ध गराउन संघीय सरकारसँग माग गर्ने निर्णय गरेको हो। त्यस्तै, मधेस प्रदेश सरकारसँग पनि विशेष राहत प्याकेजका लागि माग गर्ने निर्णय बैठकमा सहभागी नेकपा एमाले पर्साका सचिव महेश दासले बताउनुभयो ।
पछिल्लो एक महिनादेखि वीरगञ्ज महानगरपालिकासहित पर्सा जिल्लाभरि परेको खडेरीका कारण चापाकलहरू सुकेका छन्। सर्वदलीय बैठकले खानेपानी संकट समाधानका लागि वीरगञ्ज महानगरपालिका, नेपाल खानेपानी संस्थान वीरगन्ज र सम्बन्धित सरोकारवाला निकायहरूमा संयुक्त दलहरूको टोली पठाएर छलफल गर्ने निर्णय गरेको छ।
त्यस्तै, खानेपानी समस्याको समाधानका लागि भइरहेको सरकारी कामको सर्वदलीय अनुगमन गर्ने निर्णय पनि भएको एमाले सचिव दासले जानकारी दिनुभयो ।
नेपाली कांग्रेस पर्साका कार्यवाहक सभापति रामनारायण प्रसाद कुर्मीको अध्यक्षतामा सम्पन्न उक्त बैठकमा नेकपा एमाले पर्साका सचिव महेश दास, नेकपा माओवादी केन्द्रका केन्द्रीय सदस्य रामबाबु बैठा, राष्ट्रिय स्वतन्त्र पार्टी पर्साका सभापति हरि पन्त, जनता समाजवादी पार्टी (जसपा) नेपाल पर्साका अध्यक्ष रामनरेश यादव, नेकपा एकीकृत समाजवादी पार्टी पर्साका अध्यक्ष बालगोपाल थापा, जसपाका संघीय परिषद् सदस्य तबरेज अहमद, जनमत पार्टी पर्साका अध्यक्ष ओमप्रकाश सरार्फ लगायतको सहभागिता थियो।
