वीरगन्ज,आसन्न स्थानीय तहको निर्वाचनमा पर्साको बहुदरमाई नगरपालिका नेकपा एमालेबाट नगरपालिकाको प्रमुख पदमा शिव पटेल र उपप्रमुखमा सुष्मा कुशवाहाको नाम सिफारिस भएको छ ।
एमाले बहुदरमाई नगर कमिटीको शुक्रबार वडा नम्बर २ को पिपरामा बसेको बैठकले पार्टीबाट मेयरमा पटेल र उपमेयरमा कुशवाहाको नाम सिफारिस गरेको हो ।
पार्टीका केन्द्रीय सदस्य एवम् जिल्ला सहईन्चार्ज राजकुमार गुप्ताको प्रमुख आतिथ्यमा भएको बैठकमा नगर कमिटीका सदस्यहरुले पटेल र कुशवाहाको नाम सर्वसहमतिबाट पारित गरेर जिल्ला कमिटीलाई सिफारिस गरेको नगर कमिटीका अध्यक्ष प्रमोद कुशवाहाले जानकारी दिनुभयो ।
बैठकमा नेकपा एमाले प्रदेश कमिटी सदस्य तेजप्रकाश निषाद, जिल्ला उपाध्यक्ष फरमान अन्सारी, सचिव मनोज गुप्ता, सह–सचिव सन्जिव मिश्रा, जिल्ला कमिटी सदस्य ध्रुब साह, केदार तिवारी, पुरनप्रसाद कुर्मी, रामबाबू साह, सुनिल कुशवाहा, लगायतको उपस्थिति रहेको नगर कमिटीका सचिव सुरेन्द्र यादवले बताउनुभयो ।
पटेल गत फागुनमा लोकतान्त्रिक समाजवादी पार्टी परित्याग गरेर एमाले प्रवेश गर्नुभएको थियो । उहाँ अघिल्लो स्थानीय तहको निर्वाचनमा तत्कालिन राष्ट्रिय जनता पार्टीबाट मेयर पदमा निर्वाचन लडनुभएको थियो । दुई हजार ५१ मत ल्याउनुभएको उहाँ त्यतिबेला नेपाली कांग्रेसका नितेन्द्र साहसँग पराजित हुुनुभएको थियो ।
