कलैया,बाराको कलैया उपमहानगरपालिका वडा नम्बर १२ धर्मनगरमा श्रीगुरु रबिदास दलित धर्मशालाको शुक्रबार एक कार्यक्रमबीच शिलान्यास गरिएको छ ।
कलैया उपमहानगरपालिकाका नगर प्रमुख राजेशराय यादवले धर्मशालाको शिलान्यास गर्नुभएको हो । दलित समुदायहरुको बिहे, ब्रतबन्धलगायत अन्य समाजिक कामकाजमा सहजताका लागि धर्मशाला निर्माण गर्न लागिएको श्रीगुरु रबिदास दलित धर्मशालाकी अध्यक्ष एवम पूर्वमन्त्री कलावती पासवानले जानकारी दिनुभयो ।
धर्मशाला उद्घाटन कार्यक्रमलाई सम्बोधन गर्दै नगर प्रमुख यादवले सुविधा सम्पन्न धर्मशाला निर्माणका लागि आर्थिक बर्ष २०७७÷७८ को बजेटमा रु १५ लाख छुटाइएको र चालु आर्थिक वर्षमा थप बजेटको व्यवस्था गर्ने पनि बताउनुभयो । पूर्वसहायक मन्त्री पासवानको अध्यक्षतामा भएको सो कार्यक्रममा कलैया उपमहानगरपालिका वडा नम्बर १२ का वडा अध्यक्ष राजेश्वर केसरी, गुरु रबिदासका किशोरी रामलगायतकाले शुभकामना मन्तव्य व्यक्त गर्नुभएको थियो । करिब ५० लाखको लागतमा धर्मशाला निर्माण गर्न लागिएको हो ।
