पुष्पराज खतिवडा,
मनहर्वा, १५ भदौँ– सशस्त्र प्रहरी बलको टोलीले निजगढ नगरपालिका वडा नम्बर १३ डम्मरपुरस्थित शक्ति खोला डाँडा जंगलमा लगाइएको गाँजा खेती हिजो नष्ट गरेको छ ।
सशस्त्र प्रहरी बल, नेपाल नं. १२ गण हेडक्वार्टर उत्तरझिट्कैंया मातहतको सुरक्षा बेश रतनपुरीको टोलीले जंगलभित्र लगाइएको ५ कठ्ठा जमिनको गाँजा खेति नष्ट गरेको हो ।
सशस्त्र प्रहरी सुरक्षा वेश र नेपाल प्रहरीको अस्थायी प्रहरी चौकी रतनपुरीबाट खटिएकोे संयुक्त टोलीले गाँज खेति नष्ट गरेको सशस्त्र प्रहरी उपरीक्षक रबिनराज कर्णजीतले जानकारी दिनुभयो । जिल्लाको सुदुरउत्तरमा पर्ने मकवानपुरको सीमा क्षेत्रको चुरे खोच र जंगलकोबीचमा स्थानीयले लुकिछिपी लामो समयदेखि गाँजा खेति गर्दै आएका छन ।
यसअघि पनि सो क्षेत्रमा गाँजा खेति हुने गरेको र सुरक्षाकर्मीले पनि पटकपटक गाँजा फँडानी गर्दै आएको थियो । यसअघि शनिबार निजगढ प्रहरीले सोही क्षेत्रमा अवैध खेति गर्न राखेको गाँजाको ब्याड फडानी गरी बेर्ना नष्ट पारेको थियो ।
इलाका प्रहरी कार्यालय निजगढका प्रहरी निरीक्षक विकास थपलियाको नेतृत्वमा अस्थायी प्रहरी पोष्ट रतनपुरबाटसमेत खटिएको प्रहरी टोलीले रोप्ने बेला भएको करिव ३ कठ्ठा क्षेत्रको गाँजाको ब्याड र बेर्ना नष्ट पारेको हो । प्रहरीले गाँजा खेति गर्ने व्यक्ति र समुहको खोजी कार्य भईरहेको पनि बताएको छ ।
