जनकपुर । १५ दिने मिथिला माध्यमिकी परिक्रमा आज मडई पुग्ने भएको छ।
शुक्रबार मटिहानी (महोत्तरी) बाट निस्किएको डोलासहितको परिक्रमामा सहभागी यात्रुहरु जलेश्वर पुगेर विश्राम गरेका थिए। उनीहरु आज बिहानै मडईका लागि निस्किएका छन्।
आज मडईमा रात्री विश्राम गरेपछि (भोली) यात्रुहरूले आईतबार क्रमशः ध्रुव कुण्ड, आठौं दिन ११ गते कंचनवन, नवौं दिन १२ गते पर्वता, दशौं दिन १३ गते धनुषाधाम, एगारहौं दिन १४ गते सत्तोषर, बारहौं दिन १५ गते औरही, तेरहौं दिन १६ गते करुणा, चौदहौं दिन १७ गते विसौल हुँदै कल्याणेश्वरबाट पन्द्रहौं दिन १८ गते जनकपुरधाम आइपुग्नेछन्।
अन्तिम दिन जनकपुरधाम आइपुगेका माध्यमिकी परिक्रमा अन्तगृह परिक्रमा गरी मिथिला माध्यमिकी परिक्रमा समाप्त हुने छ।
मिथिलाको महाकुम्भ भनेर चिनिने यो धार्मिक यात्रा १५ दिनको अवधिमा नेपाल–भारतका विभिन्न १५ पडावसहित करिब १३३ किलोमिटर यात्रा सहभागीहरूले तय गर्छन्। परिक्रमा नेपाल र भारतका १५ स्थानमा रात्रि विश्राम गर्दै अघि बढ्छ। परिक्रमामा लाखौं श्रद्धालुभक्तजनको सहभागिता हुन्छ।
