वीरगञ्ज,जिल्ला प्रहरी कार्यालय पर्साले झण्डै ६९ लाख बराबरको औषधिसहितको एउटा ट्रक नियन्त्रणमा लिएर राजस्व अनुसन्धान कार्यालय पथलैया बारामा बुझाएको छ ।बिल बिजकभन्दा बढी सामान लोड गरेको विशेष सूचनाको आधारमा आइतवार राति वीरगञ्ज महानगरपालिका वडा नम्बर ८ स्थित घण्टाघर चोकमा ना.४ ख २१६० नम्बरको मालबाहक ट्रक प्रहरीले नियन्त्रणमा लिएको थियो ।
औषधी तथा खुद्रा सामानहरु लोड गरी वीरगञ्जबाट चितवनतर्फ लैजाँदै गरेको अवस्थामा जिल्ला प्रहरी कार्यालयबाट खटिएको टोलीले बिल बिजकभन्दा बढीका सामान रहेको आशंकामा ट्रक नियन्त्रणमा लिएको हो ।नियन्त्रणमा लिइएको ट्रकमा रहेको सामानको मूल्य ६८ लाख ९१ हजार ४४९ मूल्यांकन गरी थप अनुसन्धान तथा कारबाहीको लागि राजस्व अनुसन्धान कार्यालय पथलैया बारामा बुझाइएको जिल्ला प्रहरी कार्यालय पर्साका सूचना अधिकारी प्रहरी नायव उपरीक्षक किशोर लम्सालले जानकारी दिनुभयो ।
