पर्सा । जनता समाजवादी पार्टी (जसपा) नेपालको पर्सा जिल्ला समितिमा नेतृत्व सम्बन्धी विवाद चलिरहेकै बेला अर्को एउटा समूहले जिल्ला अगुवा कार्यकर्ता भेला बोलाएको छ ।एउटा समूहले अर्को समूहका अध्यक्षलाई हटाएर नयाँ अध्यक्ष बनाएपछि त्यहाँ विवाद उत्पन्न भएको हो । यसरी विवाद उत्पन्न भएपछि मधेस प्रदेश समितिका अध्यक्ष रामबाबु यादवको संयोजकत्वमा कार्यदल गठन गरिएको छ । कार्यदल गठन भए पनि नयाँ अध्यक्ष सिंहासन साह तेलीले जिल्लाको अगुवा कार्यकर्ता भेला बोलाएका छन् ।असोज १० गते वीरगञ्जमा जिल्ला समितिको एउटा समूहको बैठक बसेको थियो । सो बैठकले बहुमतको निर्णय भन्दै रामनरेश यादवलाई अध्यक्षबाट हटाएर बहुदरमाई नगरपालिकाका मेयर सिंहासन साह तेलीलाई अध्यक्ष बनाएको थियो । तर त्यो निर्णयलाई अस्वीकार गर्दै रामनरेश यादवले विद्रोह गरेका थिए । पार्टीमा विवाद बढ्दै गएपछि मधेस प्रदेश कमिटीले हस्तक्षेप बढाएको छ । रामनरेश यादव र सिंहासन साह तेलीले आफूलाई जिल्लाको अध्यक्ष दाबी गर्दै राजनीतिक गतिविधि गरिरहेका छन् ।कात्तिक १५ गते जिल्ला अगुवा कार्यकर्ता भेला बोलाएको जसपाका केन्द्रीय सदस्य प्रदीप यादवले बताए । पर्साका जिल्ला अध्यक्ष सिंहासन हुन्, त्यसमा विवाद देखिएपछि प्रदेश समितिले छानबिन समिति गठन गरेको छ तर अहिलेसम्म छानबिन सुरु नभएको कारण अध्यक्ष सिंहासनले भेला बोलाएको उनले बताए ।कात्तिक १५ गते अगुवा कार्यकर्ता भेला सम्पन्न गरेर १७ गते पार्टी प्रवेश कार्यक्रम पनि अध्यक्ष सिंहासनकै अध्यक्षतामा राखिएको छ ।यता रामनरेश यादवले पनि पर्सा जिल्ला अध्यक्ष आफू नै रहेको भन्दै आफ्नो अध्यक्षतामा कार्यक्रम गर्दै आएका छन् ।
चार वर्ष कार्यवाहक अध्यक्ष
पर्सा जिल्लामा लामो समयदेखि अध्यक्षको विवाद चल्दै आएको हो । २०७५ माघमा जसपाका केन्द्रीय सदस्य एवं वर्तमान सांसद प्रदीप यादव जिल्ला अधिवेशनबाट पर्साको अध्यक्ष चयन भएका थिए । अध्यक्षका लागि चुनाव भएको थियो । उनको विरुद्धमा मञ्जुर अन्सारीले उम्मेदवारी दिएका थिए । तर मन्जुरले चार मतमात्र ल्याएका थिए । प्रदीप यादव जिल्लाको अध्यक्ष भएको ६ महिनापछि केन्द्रीय समितिको बैठकले लाटभिया देशको राजधानी रिगामा भएको ‘इन्टरनेशनल नेटवर्क अफ पार्लियामेन्टेरियन अन फ्रि तिब्बत’ को कार्यक्रममा सहभागी भएको आरोपमा २०७६ असारमा ६ मा उनलाई निलम्बन गरेको थियो ।यादव जिल्ला अध्यक्षबाट हटेपछि विधान अनुसार उपाध्यक्ष सुन्दर कुर्मीलाई कार्यवाहक अध्यक्ष बनाउनुपर्ने थियो तर पार्टीका केन्द्रीय अध्यक्ष उपेन्द्र यादवको जोडबलमा जिल्ला सदस्य रहेका रामनरेश यादवलाई कार्यवाहक अध्यक्ष बनाइएको थियो ।त्यसरी उपाध्यक्षलाई कार्यवाहक अध्यक्षको जिम्मेवारी नदिएर जिल्ला सदस्यलाई जिल्लाको अध्यक्ष बनाएपछि जिल्ला कमिटीमा झन् असन्तुष्टि बढ्यो । उपाध्यक्ष सुन्दर कुर्मीले पनि आफू कार्यवाहक अध्यक्ष हुन नपाएकोमा अन्तुष्टि जनाइरहेका थिए । तर उनलाई विभिन्न प्रलोभनमा पारेर थामथुम पारिएको थियो । रामनरेश यादव कार्यवाहक भएर काम गर्न थालेपछि जिल्लामा पटक पटक विवाद उत्पन्न भइरहेको थियो ।अधिवेशन गराउनका लागि उनलाई दबाब परिरहेको थियो । प्रदीप यादव निलम्बनबाट फुकुवा भएपछि पार्टीले रामनरेश यादवलाई नै अध्यक्ष कायम राखेको थियो । प्रत्येक दुई वर्षमा अधिवेशन गराउने प्रावधान हुँदा हुँदै अध्यक्ष रामनरेश यादवले विभिन्न बहानामा त्यसलाई टार्दै गए ।एक पटक त उनलाई कार्यवाहक अध्यक्षबाट हटाउने चर्चा पनि चलेको थियो तर त्यतिबेला जसपाका तत्कालीन नेता विजय सरावगी पार्टी छाड्ने तयारीमा थिए । कार्यवाहक अध्यक्षबाट हटाए आफू पनि पार्टी छाड्ने धम्की दिएपछि स्थानीय चुनावसम्म उनलाई नै कायम राखियो ।स्थानीय चुनाव सकेपछि पनि अधिवेशन गराउन पहल नगरेपछि पटकपटक जिल्लामा विवाद उत्पन्न भएको थियो । कयौँ पटक केन्द्रीय अध्यक्ष उपेन्द्र यादव आफैँ गएर पनि विवाद समाधान गरेका थिए ।प्रतिनिधि सभाको चुनाव सकिए पनि अधिवेशन गराउने सुर नभएपछि जिल्ला कमिटीको बहुमत सदस्यको बैठक बसेर उनलाई हटाएको पर्साका नेताहरू बताउँछन् । उनलाई हटाएपछि अहिले मधेस कमिटीले कार्यदल गठन गरी हस्तक्षेपकारी भूमिकामा आएको छ । कार्यदलले कमिटी पुनर्गठन गर्ने आन्तरिक तयारीमा लागेको बेला अध्यक्ष सिंहासनले पार्टी गतिविधिमा तीव्रता दिएका छन् ।
