नरेश गुप्ता
बरियारपुर,कलैयामा दुई बालकको हत्या गरेको आशंकामा प्रहरीले थप एकजनालाई पक्राउ गरी अनुसन्धान अघि बढाएको छ ।
हत्यामा संलग्नलाई तत्काल पत्ता लगाएर कारबाही गर्न चौतर्फी दवाब बढेपछि प्रहरीले २ जनालाई पक्राउ गरी अनुसन्धान अघि बढाएको बताएको छ । पक्राउ परेका मध्ये १ जना घटनाकै दिन र अर्का एकजनालाई भने शुक्रबार पक्राउ गरि अनुसन्धान अघि बढाइएको जिल्ला प्रहरी कार्यालय बाराका प्रहरी नायव उपरीक्षक एंव प्रहरी प्रवक्ता गौतम मिश्रले जानकारी दिनुभयो । प्रहरीले अनुसन्धान प्रभावित हुन सक्ने भन्दै पक्राउ परेकाहरुको बारेमा शनिबारसम्म कुनै विवरण सार्वजनिक गरेको छैन ।
पक्राउ परेकाहरुबाट नै घटनाको सत्यतथ्य खुल्ने क्रममा रहेकोले घटनाको बारेमा प्रहरीले २÷३ भित्रमा नै सबै विवरण सार्वजनिक गर्ने प्रवक्ता मिश्रले बताउनुभयो ।
कलैया उपमहानगरपालिका वडा नम्बर ७ रंगपुरका जफार अंसारीका ७ बर्षिय छोरा अमिन अंसारी र ९ बर्षिय उस्मानको घाँटी रेटी हत्या गरेको अवस्थामा गत मंगलबार स्थानीय एक निर्माणधिन मदर्सामा शव फेला परेको थियो । अघिल्लो दिन साँझ घरबाट हराएका दुबै दाजुभाइको लाश फेला परेको हो । बारा प्रहरीले प्रदेश नम्बर २ प्रदेश प्रहरी कार्यालय बर्दिवासबाट तालिम प्राप्त कुकुर मगाएर अनुसन्धान प्रक्रिया अगाडि बढाएको थियो ।
