काठमाडौँ — बाल अधिकारका लागि राष्ट्रिय अभियानका एक सदस्य तिलगंगा आँखा अस्पताल छेवैको मैदानमा साँझतिर टहलिन्थे । धुले चौरमा फुटबल र क्रिकेट खेल्ने वाग्मती तिरका सुकुम्बासी समुदायका बालबालिकासँग प्रत्येक दिन फुटबल खेल्थे । कहिलेकाही त क्रिकेटका लागि नयाँ जुत्ता र नयाँ ब्याट पनि हुन्थे । कमजोर आर्थिक हैसियत भएका उनीहरुसँग कहाँबाट आयो ती खेल सामाग्री ? एकाध दिनमै उनले थाह पाए, एक जना विदेशी केही दिन बिराएर त्यहाँ आउँदा रहेछन् । अनौठो त यो थियो कि, ती विदेशीले खेलकुदका सामाग्री दिएर बालबालिकालाई फकाउँदै आफसँगै लिएर जाँदा रहेछन् ।
एक दिन तीनले विदेशीसँग जाने ११ वर्षका दुई बालकलाई सोधे, ‘तिमीहरुलाई विदेशीले किन लैजान्छ ?’ ती सदस्यले बालकसँग सोधेको प्रश्नोत्तर समेटिएको भिडियो क्लिप कान्तिपुरलाई पनि प्राप्त भएको छ । उनको प्रश्नमा ती बालकले भनेका छन, ‘उसको पेटमा हाम्रो हात लगेर दल्छ । अनि त्यति नै बेला आफ्नो पेन्ट खोलेर हेर्छ ।’
भिडियोमा दुई बालकले थप भनेका छन्, ‘पिसाब फेर्ने ठाउँमा हाम्रो हात लगेर चलाउँछ अनि केही बेर चलाएपछि कफी झर्यो भन्छ ।’ बालकहरुको प्रयोग गरेर ती विदेशीले हस्तमैथुन गर्ने र वीर्य झरेपछि त्यसलाई कफी बताउने गरेको ती बालकहरुले बताएका छन् । ती बालकहरुले आफ्ना अरु साथीहरुलाई पनि साँझतिर होटलमा लैजाने गरेको बताएका छन् । पैसा र खानेकुरा दिएर बालकहरुलाई फकाउँदै कहिले एक्लै त कहिले दुई जना बालकलाई होटलमा लैजाने र यौनजन्य गतिविधिमा संग्लन गराउने गरेको देखिन्छ ।
अभियानका केही सदस्यले विदेशी नागरिकको यस्तो शंकास्पद गतिविधिबारे थाह पाएपछि उक्त भिडियो क्लिप करिब एक महिना अघि प्रहरी परिसर काठमाडौंलाई दिएका थिए । तर बाल यौन दुराचारको घटनामा परिसरका अधिकारीले अनुसन्धानलाई तीव्रता नदिएपछि जघन्य अपराधको घटना सतहमा आउन पाएन ।
विमानस्थल नजिकैको एक होटलमा बस्ने र भारतीय नम्बर प्लेटको मोटरसाइकलमा ओहोरदोहोर गर्ने ती विदेशीको संदिग्ध गतिविधिबारेको सूचना महानगरीय प्रहरी कार्यालय रानीपोखरीमा पुगेको थियो । कार्यालयले ति विदेशीबारे सुक्ष्म निगरानी गरेपछि घटनाको थप अनुसन्धान केन्द्रीय अनुसन्धान ब्युरोले सुरु गरेको थियो । ब्युरोले आइतबार राति सिनामंगलको मेमोरियल गेस्ट हाउसको कोठा नम्बर १ सय ४ बाट अमेरिकन नागरिक जेसन लोएड मुडीलाई पक्राउ गरेको छ । प्रहरीले उनको कोठाबाट तीन बालबालिकाको उद्दार गरेको छ ।
स्रोतका अनुसार पछिल्ला तीन वर्षयता नेपालमा बस्दै आएका जेसन विश्वभाषा क्याम्पसमा नेपाली भाषा सिक्ने विद्यार्थीका रुपमा भर्ना भएको देखिएको छ । साभार : ईकान्तिपुर
